Мадриднинг «Реал» клуби яримҳимоячиси Винисиус Жуниор Испания чемпионатидаги «Валенсия»га қарши ўйиндан (1:0) кейин олган дисквалификацияси ҳақида гапирди.

Бразилиялик футболчи ўша учрашувда рақиб жамоа вакили Натан-Дилан Салибани сочидан тортгани учун қизил карточка билан жазоланганди. Испания футбол федерациясининг (RFEF) интизом қўмитаси эса Винисиусни тўртта ўйинга дисквалификация қилди.

Винисиус Чемпионлар лигаси доирасида «Рома»га қарши кечган ва «Реал»нинг 4:3 ҳисобидаги ғалабаси билан якунланган учрашувдан кейин ушбу қарор юзасидан ўз муносабатини билдирди.

«Уларда дисквалификация ҳақида эълон қилиш учун бутун бир кун бор эди. Аммо менга чемпионатнинг тўртта учрашувини ўтказиб юборишим ҳақида фақат стадионга етиб келганимизда хабар беришди.

Сочдан тортиш билан боғлиқ ушбу қоида бизга ҳеч қачон тушунтирилмаган. Ла Лига ва ҳакамлар қўмитаси вакиллари мунтазам равишда олдимизга келиб, қоидаларни тушунтиришади. Аммо айнан шу ҳолат ҳеч қачон муҳокама қилинмаган.

Мен учун бу вазият қизил карточка билан якунланди, холос. Мен ҳеч қачон бошқа футболчиларга нисбатан тажовузкорлик қилмаганман.

Мени ҳам тез-тез уришади, аммо охир-оқибат карточкани айнан мен оламан», — дея Винисиуснинг сўзларини келтиради ESPN.

Шу тариқа, Винисиус Испания Ла Лигасидаги навбатдаги тўртта учрашувни ўтказиб юборади. У «Севилья», «Барселона», «Расинг» ва «Валенсия»га қарши баҳсларда жамоасига ёрдам бера олмайди.