Madridning "Real" klubi muxlislari jamoa bosh murabbiyi Xabi Alonsoni qo‘llab-quvvatlashini bildirdi.

Shanba kuni "qaymoqranglilar" o‘z uyida "Sevilya"ni mag‘lub etib (2:0), qatorasiga uchinchi g‘alabani qo‘lga kiritdi. G‘alabali seriya boshlanishidan oldin ispaniyalik mutaxassis ishdan bo‘shatilish arafasida edi, ammo endi unga iste’fo xavf solmaydiganga o‘xshaydi. Madrid Universal xabariga ko‘ra, Alonso "Santyago Bernabeu"ni tark etayotganida bir necha muxlis uning mashinasi oldiga kelib, "Olg‘a, Xabi, biz sen bilan" deya hayqira boshlagan. Ba’zilari murabbiy bilan suratga ham tushgan.

"Real" La Liga turnir jadvalida 18-turdan keyin 2-o‘rinda bormoqda. 4 yanvar kuni madridliklar "Betis"ga qarshi maydonga tushadi.