Мадриднинг "Реал" клуби мухлислари жамоа бош мураббийи Хаби Алонсони қўллаб-қувватлашини билдирди.
Шанба куни "қаймоқранглилар" ўз уйида "Севилья"ни мағлуб этиб (2:0), қаторасига учинчи ғалабани қўлга киритди. Ғалабали серия бошланишидан олдин испаниялик мутахассис ишдан бўшатилиш арафасида эди, аммо энди унга истеъфо хавф солмайдиганга ўхшайди. Madrid Universal хабарига кўра, Алонсо "Сантьяго Бернабеу"ни тарк этаётганида бир неча мухлис унинг машинаси олдига келиб, "Олға, Хаби, биз сен билан" дея ҳайқира бошлаган. Баъзилари мураббий билан суратга ҳам тушган.
"Реал" Ла Лига турнир жадвалида 18-турдан кейин 2-ўринда бормоқда. 4 январь куни мадридликлар "Бетис"га қарши майдонга тушади.
