Yangi mavsumda Dubayda tayyorgarlik ko‘rayotgan «Dinamo» jamoasi dastlabki xalqaro uchrashuvini Qozog‘istonning «Qaysar» klubiga qarshi o‘tkazdi.
«Ar-Rashid» stadionida kechgan bahsda Vadim Abramov jamoa safida deyarli barcha futbolchilarga imkoniyat berdi. Uchrashuvning 1-daqiqasidayoq Nurulla To‘xtasinovning uzatmasidan keyin Anvarjon Hojimirzayev hisobni ochgan bo‘lsa, birinchi bo‘lim yakunida qozoqlar hisobni tenglashtirishdi – 1:1.
Ikkinchi bo‘limda esa Hojimirzayev dastlab dublini nishonladi, ko‘p o‘tmay Sanjar Qodirqulov jarima zarbasidan qoyilmaqom gol urib, hisobni 3:1ga yetkazdi.
Shu tariqa, Samarqand klubi yig‘indagi dastlabki bahsida Qozog‘iston jamoasidan ustun keldi.
Xalqaro o‘rtoqlik o‘yini. 19 yanvar
Dubay, Al-Rashid stadioni.
«Dinamo» (Samarqand, O‘zbekiston) - «Qaysar» (Qizilo‘rda, Qozog‘iston) – 3:1
Gollar: Anvarjon Hojimirzayev 1, 52 penaltidan, Sanjar Qodirqulov 57 – Nurdavlet Agzambayev 33.
«Dinamo»: Edem Nemanov, Jahongir O‘rozov, Jaloliddin Jumaboyev, Salim Mustafoyev, Sanjar Qodirqulov, Til Mavretich, Nurullo To‘xtasinov, Mirjahon Mirahmadov, Jahongir Abdusalomov, Azizbek Amonov, Anvarjon Hojimirzayev.
