Янги мавсумда Дубайда тайёргарлик кўраётган «Динамо» жамоаси дастлабки халқаро учрашувини Қозоғистоннинг «Қайсар» клубига қарши ўтказди.

«Ар-Рашид» стадионида кечган баҳсда Вадим Абрамов жамоа сафида деярли барча футболчиларга имконият берди. Учрашувнинг 1-дақиқасидаёқ Нурулла Тўхтасиновнинг узатмасидан кейин Анваржон Ҳожимирзаев ҳисобни очган бўлса, биринчи бўлим якунида қозоқлар ҳисобни тенглаштиришди – 1:1.

Иккинчи бўлимда эса Ҳожимирзаев дастлаб дублини нишонлади, кўп ўтмай Санжар Қодирқулов жарима зарбасидан қойилмақом гол уриб, ҳисобни 3:1га етказди.

Шу тариқа, Самарқанд клуби йиғиндаги дастлабки баҳсида Қозоғистон жамоасидан устун келди.

Халқаро ўртоқлик ўйини. 19 январ
Дубай, Ал-Рашид стадиони.
«Динамо» (Самарқанд, Ўзбекистон) - «Қайсар» (Қизилўрда, Қозоғистон) – 3:1
Голлар: Анваржон Ҳожимирзаев 1, 52 пеналтидан, Санжар Қодирқулов 57 – Нурдавлет Агзамбаев 33.
«Динамо»: Эдем Неманов, Жаҳонгир Ўрозов, Жалолиддин Жумабоев, Салим Мустафоев, Санжар Қодирқулов, Тил Мавретич, Нурулло Тўхтасинов, Миржаҳон Мираҳмадов, Жаҳонгир Абдусаломов, Азизбек Амонов, Анваржон Ҳожимирзаев.