«Реал»даги спорт инқирози катта муҳокамаларга сабаб бўлмоқда. Мавсумни беқарор бошлаган мадридликлар еттита ўйиннинг иккитасида мағлуб бўлди ва «Барселона»дан олти очко ортда қолмоқда. Шу боис клуб вазиятни ўзгартириш учун янги ечимлар изламоқда. Маълумотларга кўра, Мадрид клуби эътиборини «Штутгарт» футболчисига қаратган.

Fichajes.net портали хабарига кўра, Анжело Штиллер испан клубининг трансфер рўйхатида юқори ўринни эгаллаб турибди. Ярим ҳимояда ўйинни бошқара оладиган футболчига бир қатор клублар қизиқиш билдирмоқда. Унинг трансфер қиймати тахминан 50 миллион евро атрофида бўлиши мумкинлиги айтилмоқда.

Тажрибали мутахассис Жозе Моуриньо ҳам Штиллернинг катта тарафдори экани ва футболчини жуда юқори баҳолаши қайд этилган.

Штиллер «Штутгарт» сафида ҳафта сайин юқори савиядаги ўйинлари билан халқаро даражадаги катта вазифаларни бажаришга тайёр эканини кўрсатмоқда. Бош мураббий Себастьян Хёнесс қўл остида мюнхенлик футболчи таянч ярим ҳимоясида асосий ўйинчилардан бири ҳисобланади ва жорий мавсумдаги барча расмий учрашувларда майдонга тушди.

Шунга қарамай, унинг Германия миллий терма жамоасига йўли ҳозирча осон кечмаяпти. Чап оёқда ўйнайдиган ярим ҳимоячи миллий жамоа бош мураббийи Юрген Клоппнинг амалдаги таркибидан жой олмаган.

Агар «Реал» ҳақиқатан ҳам қишки трансферлар ойнасида Штиллер учун мурожаат қилса, «Штутгарт» музокараларда кучли позицияда бўлади. Чунки футболчининг клуб билан шартномаси 2028 йилга қадар амал қилади.