«Real»dagi sport inqirozi katta muhokamalarga sabab bo‘lmoqda. Mavsumni beqaror boshlagan madridliklar yettita o‘yinning ikkitasida mag‘lub bo‘ldi va «Barselona»dan olti ochko ortda qolmoqda. Shu bois klub vaziyatni o‘zgartirish uchun yangi yechimlar izlamoqda. Ma’lumotlarga ko‘ra, Madrid klubi e’tiborini «Shtutgart» futbolchisiga qaratgan.

Fichajes.net portali xabariga ko‘ra, Anjelo Shtiller ispan klubining transfer ro‘yxatida yuqori o‘rinni egallab turibdi. Yarim himoyada o‘yinni boshqara oladigan futbolchiga bir qator klublar qiziqish bildirmoqda. Uning transfer qiymati taxminan 50 million yevro atrofida bo‘lishi mumkinligi aytilmoqda.

Tajribali mutaxassis Joze Mourinyo ham Shtillerning katta tarafdori ekani va futbolchini juda yuqori baholashi qayd etilgan.

Shtiller «Shtutgart» safida hafta sayin yuqori saviyadagi o‘yinlari bilan xalqaro darajadagi katta vazifalarni bajarishga tayyor ekanini ko‘rsatmoqda. Bosh murabbiy Sebastyan Xyoness qo‘l ostida myunxenlik futbolchi tayanch yarim himoyasida asosiy o‘yinchilardan biri hisoblanadi va joriy mavsumdagi barcha rasmiy uchrashuvlarda maydonga tushdi.

Shunga qaramay, uning Germaniya milliy terma jamoasiga yo‘li hozircha oson kechmayapti. Chap oyoqda o‘ynaydigan yarim himoyachi milliy jamoa bosh murabbiyi Yurgen Kloppning amaldagi tarkibidan joy olmagan.

Agar «Real» haqiqatan ham qishki transferlar oynasida Shtiller uchun murojaat qilsa, «Shtutgart» muzokaralarda kuchli pozisiyada bo‘ladi. Chunki futbolchining klub bilan shartnomasi 2028 yilga qadar amal qiladi.