Angliya chempionatining 25-turi doirasida Londonning «Arsenal» klubi «Sanderlend» ustidan 3:0 hisobida yirik g‘alabaga erishdi. Ushbu muvaffaqiyatdan so‘ng «kanonirlar»ning ikkinchi o‘rindagi jamoadan farqi to‘qqiz ochkoga yetdi.
Jamoa ustozi Mikel Arteta Premyer-ligadagi peshqadamlik borasida o‘z fikrlarini bildirdi.
«Bunday farq hali hech narsani anglatmaydi. O‘z maqsadimizga erishish uchun hali ko‘plab o‘yinlarda g‘alaba qozonishimiz kerak. Diqqat-e’tiborni saqlab qolish lozim. Biz «Sanderlend»ga qarshi o‘yinda o‘z ishimizni a’lo darajada bajardik va endi «Brentford» bilan bahsga tayyorgarlik ko‘ramiz», — deya ispaniyalik mutaxassisning so‘zlarini keltiradi «ESPN».
Ikkinchi o‘rinda borayotgan «Manchester Siti» bugun, 8 fevral kuni safarda «Liverpul»ga qarshi bahs olib boradi.
