Англия чемпионатининг 25-тури доирасида Лондоннинг «Арсенал» клуби «Сандерленд» устидан 3:0 ҳисобида йирик ғалабага эришди. Ушбу муваффақиятдан сўнг «канонирлар»нинг иккинчи ўриндаги жамоадан фарқи тўққиз очкога етди.

Жамоа устози Микель Артета Премьер-лигадаги пешқадамлик борасида ўз фикрларини билдирди.

«Бундай фарқ ҳали ҳеч нарсани англатмайди. Ўз мақсадимизга эришиш учун ҳали кўплаб ўйинларда ғалаба қозонишимиз керак. Диққат-эътиборни сақлаб қолиш лозим. Биз «Сандерленд»га қарши ўйинда ўз ишимизни аъло даражада бажардик ва энди «Брентфорд» билан баҳсга тайёргарлик кўрамиз», — дея испаниялик мутахассиснинг сўзларини келтиради «ESPN».

Иккинчи ўринда бораётган «Манчестер Сити» бугун, 8 февраль куни сафарда «Ливерпуль»га қарши баҳс олиб боради.