Мадриднинг «Реал» клуби Мюнхеннинг «Бавария» клуби вингери Майкл Олисенинг трансферини амалга ошириш учун уринишларни давом эттиради. Бу ҳақда журналист Хосе Феликс Диас хабар бермоқда.

Манбанинг таъкидлашича, «Реал» президенти Флорентино Перес ва жамоанинг янги бош мураббийи Жозе Моуриньо Олисени янги лойиҳанинг энг муҳим футболчиси деб ҳисоблашмоқда ва бу ҳақда футболчининг ўзига ҳам маълум қилиб улгуришган.

Қайд этилишича, «Реал» Олисе учун камида 150 миллион евро таклиф қилишга тайёр, бироқ зарурат туғилса, «қаймоқранглилар» бу суммани 200 миллион евродан оширишга ҳам рози. Ўз навбатида, «Бавария» франциялик футболчини жамоанинг «дахлсиз» аъзоси деб ҳисоблайди ва у билан амалдаги шартномани 2031 йилгача узайтирмоқчи.

Ортда қолган клуб мавсумида 24 ёшли Олисе барча мусобақаларда жами 52 та ўйинда майдонга тушиб, 22 та гол урди ва 31 та голли узатмага муаллифлик қилди.