Мадриднинг «Атлетико» клуби ўз ҳужумчиси Хулиан Альваресни қандай сумма эвазига сотишга тайёр эканлиги маълум бўлди.
The Mirror нашрининг таъкидлашича, «матрасчилар» барча қизиқиш билдираётган клубларга, жумладан Лондоннинг «Арсенал» жамоасига ҳам Альварес фақат унинг шартномасида кўрсатилган 500 миллион евролик товон пули тўлиқ фаоллаштирилган тақдирдагина клубни тарк этишини маълум қилган.
«Атлетико» президенти Энрике Сересо Альваресни жамоада сақлаб қолиш фикрида қатъий турибди ва унинг кейинги мавсумда ҳам клубда қолишини кутмоқда. Яқиндагина ушбу функционер аргентиналик юлдузни «Реал Мадрид» клубига 150 миллион еврога сотишдан бош тортган ва бу вазиятда ҳам шартномадаги товон пули миқдорини рўкач қилган эди.
Ортда қолган 2025/26 йилги мавсумда Альварес барча мусобақаларда жами 49 та ўйинда майдонга тушиб, 20 та гол урди ва 9 та голли узатмани амалга оширди.
