Хулиан Альвареснинг трансфер эртаги давом этмоқда. «Атлетико» раҳбарияти ҳужумчини «Барселона»га қўйиб юборишни истамаяпти, бироқ аргентиналик футболчининг ўзи фақатгина Каталония клубига ўтишни хоҳламоқда.

Таниқли журналист Фернандо Полонинг хабар беришича, «кўк-анорранглилар» «матрасчилар»нинг яқинда «ПСЖ» клуби билан Альварес борасида олиб борган музокараларидан тўлиқ хабардор. Мадридликлар Париж клубининг таклифига розилик жавобини беришган, аммо футболчининг ўзи бу трансферни қатъиян рад этган — у ҳали ҳам «Барса»га ўтишдан умид қилмоқда.

Барча қийинчиликларга қарамай, «Барселона» раҳбарияти 26 ёшли ҳужумчининг трансферини барибир амалга ошира олишига ишонмоқда. Чунки футболчининг ўзи жуда қатъий қарорга келган ва трансфер жараёнида шахсан фаол иштирок этмоқда. Бу вазият Жаҳон чемпионати якунига етмагунча тўлиқ ойдинлашмаса керак.

Эслатиб ўтамиз, аввалроқ «Атлетико» клуби «Барселона»нинг 100 миллион евролик таклифини қониқарсиз деб топган эди. Шунингдек, 150 миллион евро таклиф қилган Мадриднинг «Реал» клубига ҳам рад жавоби берилган.