«Monako» bosh murabbiy Sebastyen Pokonyolida tegishli lisenziya yo‘qligi sababli 425 000 yevro miqdorida jarimaga tortiladi. Bu haqda «L’Équipe» nashri xabar bermoqda.
Nashr ma’lumotlariga ko‘ra, monegasklar ustozida uning darajasini va Fransiya oliy divizioni klublarini boshqarish imkoniyatini tasdiqlovchi sertifikat mavjud emas. Shu sababli «Monako» jamoani belgiyalik mutaxassis boshqarib tushgan har bir Liga 1 yoki Fransiya Kubogi o‘yini uchun 25 000 yevrodan to‘lashga majbur. Hozirgi vaqtda bu summa 425 000 yevroga yetdi, biroq mavsum yakunigacha u 750 000 yevrogacha ko‘tarilishi mumkin.
Pokonyoli Fransiya klubini 2025 yilning kuzida qabul qilib olgan edi. Uning qo‘l ostida «Monako» 23 ta o‘yin o‘tkazib, ularning sakkiztasida g‘alaba qozondi. Ayni damda jamoa 21 turdan so‘ng 28 ochko jamg‘argan holda Liga 1 jadvalida 10-o‘rinni egallab turibdi.
