"Yuventus" bosh murabbiyi Luchano Spalletti A Seriya 26-turidan o‘rin olgan "Komo"ga qarshi o‘yin oldidan matbuot anjumanida ishtirok etdi. U jamoaning so‘nggi natijalari va UEFA Chempionlar ligasida "Galatasaroy"ga qarshi kechgan (2:5) bahs haqida to‘xtalib o‘tdi.

"Biz so‘nggi natijalarni tushunib turibmiz va endi bunga qanday munosabat bildirishni hal qilishimiz kerak: jamoaning kuchini anglab yetish vaziyat qanday tus olishini ko‘rsatadi. Vaziyatni to‘g‘ri va xolisona tahlil qilishimiz, bu og‘riqdan keyingi yuksalish uchun tramplin sifatida foydalanishimiz lozim.

O‘yinning o‘ninchi daqiqasidayoq qizil kartochka olmasligimiz kerak. Bizni 11 ga 11 formatdagi o‘yinlarda baholashlarini istaymiz. Shunday lahzalar bo‘ladiki, yaxshiroq fikrlash va o‘zingni xaosga tortishlariga yo‘l qo‘ymaslik lozim. Qaror qabul qilish uchun sovuqqonlikni saqlash kerak. "Galatasaroy" bilan o‘yinda hissiyotlarga haddan tashqari berildik va qaror qabul qilishdagi ikkilanishlarimizni yashira olmadik", — deya murabbiyning so‘zlarini keltiradi turinliklar rasmiy sayti.

"Yuventus" — "Komo" uchrashuvi bugun, 21 fevral kuni bo‘lib o‘tadi. Bahs Toshkent vaqti bilan soat 19:00 da boshlanishi rejalashtirilgan.