Rossiyalik tadbirkor Roman Abramovichning advokatlari Buyuk Britaniya hukumatini 2022 yilda «Chelsi» sotuvidan tushgan mablag‘lar to‘liq unga tegishli ekanligi haqida ogohlantirdi. Abramovich ushbu mablag‘larni musodara qilishga bo‘lgan har qanday urinishlarga qarshi kurashishga tayyor. Bu haqda The Athletic nashri xabar bermoqda.
Klub sotuvidan tushgan £ 2,35 mlrd (€ 2,7 mlrd) miqdoridagi mablag‘ hamon Buyuk Britaniyadagi bank hisob raqamida muzlatilgan holatda qolmoqda. Ushbu hisob raqami to‘liq Abramovichga tegishli bo‘lgan kompaniya nomida. Bu vaziyat ushbu mablag‘lar Ukrainaga yordam sifatida qanday sarflanishi borasidagi uzoq davom etayotgan bahslar fonida yuzaga keldi.
«Chelsi» sotilganidan keyin Abramovich va Britaniya hukumati mablag‘larni yo‘naltirish bo‘yicha kelishuvga erisha olishmadi. So‘nggi moliyaviy hisobotlarga ko‘ra, £ 2,35 milliardning £ 1,4 milliardi Abramovichning kompaniyasiga tegishli qarzdorlik sifatida ko‘rsatilgan. Bu esa barcha mablag‘lar xayriya maqsadlariga sarflanishi borasida savollarni keltirib chiqarmoqda, chunki ushbu £ 1,4 mlrd — Abramovich klubga egalik qilgan davrida jamoaga bergan qarzi hisoblanadi.
Manbaning fikriga ko‘ra, ayni damda £ 1,4 mlrd miqdoridagi qarz masalasi Jersi orolida Abramovich mablag‘larining kelib chiqish manbasi bo‘yicha davom etayotgan jinoiy tergov jarayoni sababli ikkinchi planga o‘tgan. Ushbu mablag‘lar tergov va sud jarayonlari yakunlanmaguncha hech qanday xayriya jamg‘armasiga o‘tkazilishi mumkin emas.
