«Manchester Siti» Angliya liga kubogi finalida Londonning «Arsenal» jamoasini mag‘lub etib, turnir g‘olibiga aylandi. Musobaqa reglamentiga ko‘ra, klubga 30 ta medal topshirildi va jamoa ularni futbolchilar hamda xodimlar o‘rtasida taqsimlab chiqdi.

Medallardan biri Kelvin Fillipsga ham nasib etdi. Ushbu futbolchi 2022 yilda 49 million funt evaziga sotib olingan edi, biroq amalda Xosep Gvardiola jamoasiga moslashib keta olmadi va klub safida jami bo‘lib bor-yo‘g‘i 32 ta o‘yinda ishtirok etdi.

Karabao kubogining joriy mavsumida u maydonda atigi yetti daqiqa harakat qildi, xolos. Bu ham turnirning dastlabki bosqichida sodir bo‘lgan edi, chunki hozirda u ijara asosida ikkinchi divizion — Chempionshipda ishtirok etayotgan «Sheffild Yunayted» sharafini himoya qilmoqda.