«Манчестер Сити» Англия лига кубоги финалида Лондоннинг «Арсенал» жамоасини мағлуб этиб, турнир ғолибига айланди. Мусобақа регламентига кўра, клубга 30 та медаль топширилди ва жамоа уларни футболчилар ҳамда ходимлар ўртасида тақсимлаб чиқди.

Медаллардан бири Кэлвин Филлипсга ҳам насиб этди. Ушбу футболчи 2022 йилда 49 миллион фунт эвазига сотиб олинган эди, бироқ амалда Хосеп Гвардиола жамоасига мослашиб кета олмади ва клуб сафида жами бўлиб бор-йўғи 32 та ўйинда иштирок этди.

Карабао кубогининг жорий мавсумида у майдонда атиги етти дақиқа ҳаракат қилди, холос. Бу ҳам турнирнинг дастлабки босқичида содир бўлган эди, чунки ҳозирда у ижара асосида иккинчи дивизион — Чемпионшипда иштирок этаётган «Шеффилд Юнайтед» шарафини ҳимоя қилмоқда.