Мадриднинг «Реал» клуби «Ливерпуль» дарвозабони Гиорги Мамардашвили билан боғлиқ вазиятни кузатиб бормоқда ва келаси ёзда уни ўз сафига қўшиб олиш имкониятини кўриб чиқмоқда.
Бу ҳақда ElGOLdigital нашри хабар берди.
26 ёшли грузиялик дарвозабон Англия клубида мунтазам ўйин амалиётига эга эмас.
Мамардашвили жорий мавсумда атиги битта расмий учрашувда майдонга тушган. У 15 сентябрь куни Англия Лига кубоги доирасида «Тоттенхэм»га қарши ўтказилган баҳсда иштирок этган. Мазкур учрашув «Ливерпуль»нинг 3:1 ҳисобидаги ғалабаси билан якунланган.
Англия Премьер-лигасида эса жамоанинг асосий дарвозабони ҳамон Алиссон бўлиб қолмоқда.
Мамардашвилининг «Ливерпуль» билан амалдаги шартномаси 2031 йилнинг июнь ойи охиригача мўлжалланган.
Transfermarkt портали маълумотларига кўра, грузиялик дарвозабоннинг ҳозирги трансфер қиймати 28 миллион еврони ташкил этади.
Шу билан бирга, Мамардашвилининг келажаги Алиссон билан боғлиқ вазиятга ҳам боғлиқ бўлиши мумкин.
Бразилиялик дарвозабоннинг шартномаси 2027 йилнинг июнь ойи охиригача амал қилади. Ҳозирча келишувни яна узайтириш бўйича бир тўхтамга келинмаган.
Агар Алиссон «Ливерпуль»да қолиб, асосий дарвозабон мақомини сақлаб қолса, Мамардашвили фаолиятини бошқа клубда давом эттириш вариантларини кўриб чиқиши мумкин.
Грузиялик голкиперга «Реал»дан ташқари, аввалроқ Туриннинг «Ювентус» ва Миланнинг «Интер» клублари ҳам қизиқиш билдирган.
