Vengriya terma jamoasi bosh murabbiyi Marko Rossi «Liverpul» ustozi Arne Slotning Dominik Soboslaining o‘yin amaliyoti borasidagi gaplariga javob qaytardi.

Mersisaydliklar boshqaruvchisi vengriyaliklar murabbiylar shtabi yarim himoyachi klubda muntazam o‘ynayotgani sababli uni asrashi kerakligiga sha’ma qilgan edi.

«Men Slot bilan hech qachon shaxsan gaplashmaganman va unga biror maslahat ham bermaganman. Masalan, men undan Soboslaini himoyada ishlatmaslikni so‘rashim mumkin edi, lekin bunday qilmadim. Uning talablariga quloq solmayman va u ham, umid qilamanki, mening ishimga aralashmaydi. Albatta, agar Dominik dam olishni istasa, biz uni zo‘riqtirmaymiz, lekin sardorimiz uchun terma jamoa qanchalik muhimligini hamma biladi», — dedi Rossi matbuot anjumanida.

Bugun vengriyaliklar Sloveniya bilan o‘rtoqlik uchrashuvida maydonga tushishadi, seshanba kuni esa Gresiya bilan kuch sinashishadi.