«PSJ» bosh murabbiyi Luis Enrike Gonsalu Ramushning ko‘rsatayotgan o‘yini haqida o‘z fikrini bildirdi.

Kecha, 3 aprel kuni parijliklarning markaziy hujumchisi «Tuluza»ga qarshi bahsda (3:1) gol urishga muvaffaq bo‘ldi. O‘yindan keyingi matbuot anjumanida Enrike portugaliyalik futbolchiga ko‘proq o‘yin amaliyoti berish kerakligini tan oldi.

«Bugun Ramush 5 daqiqa o‘ynadi va gol urdi. U doimo [tarkibdan joy olish uchun] kurashadi va bu hayratlanarli. Mening unga nisbatan qilayotgan ishim adolatsizlikdir va u o‘z o‘yini bilan mening xato qilayotganimni isbotlamoqda», — dedi ispaniyalik mutaxassis.

Ramush 2024 yildan beri «PSJ» sharafini himoya qilib kelmoqda. Joriy mavsumda 24 yoshli hujumchi barcha turnirlarda 39 ta uchrashuvda maydonga tushib, 12 ta gol urdi va 2 ta golli uzatmani amalga oshirdi.