«Chelsi» sobiq hujumchisi Toni Kaskarinoning hisoblashicha, kubok musobaqalaridagi muvaffaqiyatsizliklardan so‘ng «Arsenal» shok holatiga tushib qolgan.
«So‘nggi haftalarda sodir bo‘lgan voqealardan keyin ular shok holatida bo‘lishadi. Men «Emireyts»da «Everton»ga qarshi o‘yinda edim, o‘shanda ular oxirgi daqiqalarda 2:0 hisobida g‘alabani ilib ketishgandi. Bu ajoyib bahs bo‘lgandi, «Everton» 85 daqiqa davomida juda yaxshi o‘ynadi, lekin «Arsenal» ularni baribir yengdi. Ammo hozirgi vaziyat ancha xavotirli ko‘rinmoqda. Arteta to‘g‘ri gaplarni gapiradi, lekin «Arsenal» muxlislari jamoaning holatidan, ayniqsa jarohatlar soni ortib borayotganidan juda va juda xavotirda», — deya Kaskarinoning so‘zlarini keltirmoqda talkSPORT.
O‘tgan shanba kuni «Arsenal» Angliya Kubogi chorak finalida safarda «Sautgempton»ga imkoniyatni boy berdi. Bundan biroz avvalroq esa xalqaro tanaffus oldidan Liga Kubogi finalida «Manchester Siti»ga mag‘lub bo‘lgan edi.
Bugun, 7 aprel, seshanba kuni «Arsenal» YECHL chorak finalining dastlabki o‘yinida Lissabonda «Sporting» mehmoni bo‘ladi.
