Madridning "Atletiko" klubi universal yarim himoyachisi Markos Lyorente Chempionlar ligasi chorak finali doirasidagi "Barselona"ga qarshi o‘yin oldidan shov-shuvli bayonot berdi.
"Raqibimiz kimligining ahamiyati yo‘q. Biz "Barselona" aql bovar qilmas klub ekanligini bilamiz, ammo ularga qarshi o‘yinda bor kuchingizni ishga solmasangiz, ular sizni shunchaki yo‘q qilib tashlashadi. Joriy mavsumda biz ular bilan Ispaniya Kubogida to‘qnash keldik va bu juda qiyin bo‘lgan edi.
O‘ylaymanki, biz Chempionlar ligasida ajoyib mavsumni o‘tkazyapmiz. Jamoamiz barqaror o‘yin ko‘rsatmoqda, shu sababli keyingi bosqichga chiqishga intilamiz. Chempionlar ligasida g‘olib chiqish men uchun muhim maqsad hisoblanadi", — deya qo‘shimcha qildi Lyorente.
Eslatib o‘tamiz, "Barselona" va "Atletiko" o‘rtasidagi dastlabki uchrashuv chorshanba kuni, 8 aprel kuni "Kamp Nou"da bo‘lib o‘tadi. Javob o‘yini esa seshanba, 14 aprel kuniga belgilangan.
