Kiprda o‘tkazilayotgan shaxmat bo‘yicha 2026 yilgi Nomzodlar turniri o‘zbekistonlik grossmeyster Javohir Sindarov uchun muvaffaqiyatli davom etmoqda.
Musobaqaning ikkinchi davrasini (8-tur) boshlab bergan bahsda Sindarov FIDE bayrog‘i ostida ishtirok etayotgan rossiyalik grossmeyster Andrey Yesipenko bilan durang o‘ynadi. Tomonlar debyutda bexato harakat qilishdi. Javohir 20-yurishga kelib piyodani h4 surish orqali hujum rejasini tuza boshladi. Andrey esa hamyurtimizning hujumini qaytarish maqsadida Farzinlarni almashishni taklif qildi. Javohir almashishni istamadi, ammo yurishlar 3 marta takrorlangach, 24-yurishda shaxmatchilar durangga imzo chekishdi.
Ushbu natija evaziga Javohir 6,5 ochko bilan turnir jadvalidagi peshqadamligini saqlab qoldi. Ikkinchi o‘rindagi Fabiano Karuana esa bugun qora donalarda Xikaru Nakamuraga qarshi o‘ynab, imkoniyatni boy berib qo‘ydi.
Buning oqibatida Sindarov yaqin ta’qibchilari — Fabiano Karuana va Anish Giridan 2 ochkoga ilgarilab ketdi.
Eslatib o‘tamiz, 15 aprelga qadar davom etadigan ushbu turnir g‘olibi amaldagi jahon chempioni, hindistonlik Gukesh Dommarajuga qarshi shaxmat toji uchun kechadigan bahsda ishtirok etish huquqini qo‘lga kiritadi. 700 ming AQSH dollari miqdoridagi sovrin jamg‘armasiga ega musobaqa ikki davradan (14 ta tur) iborat.
