«Bornmut» hujumchisi Eli Junior Krupi Angliya Premyer-ligasi grandlarining transfer maqsadiga aylandi.
CaughtOffside nashrining xabariga ko‘ra, 19 yoshli porloq yulduzni o‘z safiga qo‘shib olish uchun «Liverpul» va «Chelsi» jamoalari kurash olib borish niyatida. Taxminlarga ko‘ra, «olchalar» (Bornmut laqabi) istiqbolli fransuz uchun taxminan 60 million funt sterling (taxminan 69 million yevro) talab qiladi.
Transfermarkt ekspertlarining bahosiga ko‘ra, Eli Junior Krupining bozor qiymati 40 million yevroni tashkil etadi. Angliya chempionatining joriy mavsumida yosh hujumchi «Bornmut» safida 27 ta o‘yinda maydonga tushib, 10 ta golni o‘z hisobiga yozib qo‘ydi. Xususan, futbolchi so‘nggi ikki uchrashuvda «Arsenal» va «Manchester Yunayted» darvozalarini ishg‘ol qilishga muvaffaq bo‘ldi.
