«Chelsi» klubi «Tottenxem» va «Vest Xem» jamoalarining Angliya Premyer-ligasida jon saqlab qolish uchun olib borayotgan kurashini diqqat bilan kuzatib bormoqda. Agar ushbu jamoalar mavsum yakuniga ko‘ra Chempionshipga tushib ketsa, «shporlar» va «bolg‘achilar»ning ko‘plab yetakchilari klubni tark etishga harakat qilishlari mumkin.

Jurnalist Saymon Fillipsning xabar berishicha, «Chelsi» bu vaziyatdan o‘z manfaatlari yo‘lida foydalanishga tayyor: «ko‘klar» «Tottenxem»dan Mohammed Kudus va Lukas Bergvallga, shuningdek, «Vest Xem»dan Jarrod Bouenga da’vogarlik qilmoqda. Agar klublar quyi divizionga tushib ketsa, ushbu futbolchilarning barchasi pasaytirilgan narxlarda sotib olinishi mumkin.

Ayni damda «Tottenxem» 30 ochko bilan xavfli hududda — 18-o‘rinda bormoqda. «Vest Xem» esa 32 ochko bilan 17-pog‘onani egallab turibdi. Mavsum yakuniga qadar oltita tur qoldi.