«Barselona» klubi yarimhimoyachisi Mark Bernal jamoaning umumiy mashg‘ulotlarini yana bir bor o‘tkazib yubordi. Bu haqda Ispaniyaning Diario Sport nashri xabar bermoqda.

Ma’lumotlarga ko‘ra, 18 yoshli futbolchi ayni paytda to‘pig‘idan olgan jarohatidan tiklanish jarayonini davom ettirmoqda va hozircha faqatgina sport zalidagi mashg‘ulotlar bilan cheklanmoqda. Shu sababli uning Ispaniya chempionati doirasida chorshanba kuni bo‘lib o‘tadigan «Selta»ga qarshi uchrashuvda ishtirok etishi so‘roq ostida qolmoqda.

Jamoa bosh murabbiyi Xansi Flik va klub tibbiy shtabi futbolchining salomatligi borasida ehtiyotkorlik choralarini ko‘rmoqda. Jarohat qaytalanishining oldini olish maqsadida Bernalni maydonga tushirishga shoshilinmayapti. Eslatib o‘tamiz, yosh iqtidor sohibi jarohati sababli jamoasining so‘nggi uchta o‘yinini ham o‘tkazib yuborgan edi.

Yevropa Chempionlar ligasidan chiqib ketgan «Barselona» bor e’tiborini ichki chempionatdagi chempionlik poygasiga qaratgan. Ayni damda kataloniyaliklar turnir jadvalida yaqin ta’qibchisidan 9 ochko ilgarilab ketgan holda peshqadamlik qilmoqda.