«Барселона» клуби яримҳимоячиси Марк Берналь жамоанинг умумий машғулотларини яна бир бор ўтказиб юборди. Бу ҳақда Испаниянинг Diario Sport нашри хабар бермоқда.
Маълумотларга кўра, 18 ёшли футболчи айни пайтда тўпиғидан олган жароҳатидан тикланиш жараёнини давом эттирмоқда ва ҳозирча фақатгина спорт залидаги машғулотлар билан чекланмоқда. Шу сабабли унинг Испания чемпионати доирасида чоршанба куни бўлиб ўтадиган «Сельта»га қарши учрашувда иштирок этиши сўроқ остида қолмоқда.
Жамоа бош мураббийи Ханси Флик ва клуб тиббий штаби футболчининг саломатлиги борасида эҳтиёткорлик чораларини кўрмоқда. Жароҳат қайталанишининг олдини олиш мақсадида Бернални майдонга туширишга шошилинмаяпти. Эслатиб ўтамиз, ёш иқтидор соҳиби жароҳати сабабли жамоасининг сўнгги учта ўйинини ҳам ўтказиб юборган эди.
Европа Чемпионлар лигасидан чиқиб кетган «Барселона» бор эътиборини ички чемпионатдаги чемпионлик пойгасига қаратган. Айни дамда каталонияликлар турнир жадвалида яқин таъқибчисидан 9 очко илгарилаб кетган ҳолда пешқадамлик қилмоқда.
