Myunxenning «Bavariya» klubi Germaniya Kubogi yarim finalida «Bayer» ustidan 2:0 hisobida g‘alaba qozonib, final yo‘llanmasini qo‘lga kiritdi. Myunxenliklarga g‘alaba keltirgan gollarga Xarri Keyn va Luis Dias mualliflik qilishdi.
O‘yindan so‘ng «Bavariya» bosh murabbiyi Vensan Kompani o‘z fikrlari bilan o‘rtoqlashdi:
«Birinchi kundan beri hamma Berlindagi final haqida gapiradi. Nihoyat u yerda o‘ynashimizdan juda xursandman. Bugun birinchi bo‘limni a’lo darajada o‘tkazdik — yuqori intensivlik bilan harakat qilib, raqibga imkoniyat qoldirmadik. Tanaffusdan so‘ng «Bayer» bosimni oshirdi va bizni himoyalanishga majbur qildi, ammo vaziyatni yaxshi nazorat qildik. Biz barcha sovrinlarni yutishimiz mumkin va bu jarayondan zavq olmoqdamiz», — deya murabbiyning so‘zlaridan iqtibos keltiradi Bayern & Germany.
Germaniya Kubogining ikkinchi finalchisi payshanba kuni bo‘lib o‘tadigan «Shtutgart» va «Frayburg» jamoalari o‘rtasidagi bahsdan so‘ng ma’lum bo‘ladi. Hal qiluvchi final uchrashuvi an’anaga ko‘ra Berlinda o‘tkaziladi.
