Мюнхеннинг «Бавария» клуби Германия Кубоги ярим финалида «Байер» устидан 2:0 ҳисобида ғалаба қозониб, финал йўлланмасини қўлга киритди. Мюнхенликларга ғалаба келтирган голларга Харри Кейн ва Луис Диас муаллифлик қилишди.
Ўйиндан сўнг «Бавария» бош мураббийи Венсан Компани ўз фикрлари билан ўртоқлашди:
«Биринчи кундан бери ҳамма Берлиндаги финал ҳақида гапиради. Ниҳоят у ерда ўйнашимиздан жуда хурсандман. Бугун биринчи бўлимни аъло даражада ўтказдик — юқори интенсивлик билан ҳаракат қилиб, рақибга имконият қолдирмадик. Танаффусдан сўнг «Байер» босимни оширди ва бизни ҳимояланишга мажбур қилди, аммо вазиятни яхши назорат қилдик. Биз барча совринларни ютишимиз мумкин ва бу жараёндан завқ олмоқдамиз», — дея мураббийнинг сўзларидан иқтибос келтиради Bayern & Germany.
Германия Кубогининг иккинчи финалчиси пайшанба куни бўлиб ўтадиган «Штутгарт» ва «Фрайбург» жамоалари ўртасидаги баҳсдан сўнг маълум бўлади. Ҳал қилувчи финал учрашуви анъанага кўра Берлинда ўтказилади.
