Yarim o‘rta vazn toifasida UFC chempioni Islam Maxachevning navbatdagi raqibi ma’lum bo‘ldi. Kamar sohibi mag‘lubiyat nimaligini bilmay kelayotgan ekvadorlik Maykl Moralesga qarshi oktagonga chiqishi kutilmoqda.
26 yoshli Morales Las-Vegasdagi UFC ofisida tushgan suratini ijtimoiy tarmoqlardagi sahifasiga joylashtirdi. Sportchining so‘zlariga ko‘ra, u allaqachon Maxachevga qarshi jang uchun shartnomaga qo‘l qo‘ygan. O‘z navbatida, Islam Maxachev ham iyul oyida navbatdagi jangini o‘tkazishiga ishora qilib chiqdi.
Ma’lumot uchun, Islam Maxachev avstraliyalik Jek Della Maddalenani hakamlarning yakdil qarori bilan mag‘lub etib, yarim o‘rta vazn toifasida chempionlik kamarini qo‘lga kiritgan edi.
Uning ehtimoliy raqibi Maykl Morales esa aralash yakkakurashlar (MMA) olamida katta istiqbolli sportchi hisoblanadi. U hozirga qadar o‘tkazgan 19 ta jangining barchasida g‘alaba qozongan va UFC reytingida uchinchi pog‘onani egallab turibdi.
