Italiyaning «Milan» klubi sobiq futbolchisi Ruud Gullit italiyalik jurnalistlar tomonidan tez-tez tanqid qilinayotgan portugaliyalik hujumchi Rafael Leau haqida o‘z fikrlari bilan o‘rtoqlashdi. Gullitning hisoblashicha, futbolchining barcha iqtidori va jismoniy imkoniyatlariga qaramay, uning xayoli futbol bilan band emas.
«Leau — buyuk o‘yinchi, lekin uning kallasida shubha va chalg‘ituvchi o‘ylar bor. Menda shunday taassurot uyg‘onmoqda. Uning diqqat-e’tiborini jamlaganini ko‘rmayapman. Juda beqaror. Bir o‘yinni 9 ballga o‘tkazsa, boshqasida 4 ballga loyiq o‘ynaydi», — deya Gullitning so‘zlaridan iqtibos keltiradi piantamilan.it nashri.
Eslatib o‘tamiz, portugaliyalik futbolchi 2019 yildan beri «Milan» sharafini himoya qilib kelmoqda.
