«Manchester Siti» bosh murabbiyi Pep Gvardiola Jeremi Doku va Maykl Kin ishtirokidagi bahsli vaziyat haqida o‘z fikrini bildirdi.
APLning 35-turi doirasida «shaharliklar» safarda «Everton» bilan durang o‘ynashdi (3:3). Uchrashuvning 45-daqiqasida mezbonlar himoyachisi Kin mehmonlar vingeri Dokuning oyog‘iga orqadan zarba berdi. Belgiyalik futbolchi maydonga yiqilib, oyog‘i va yuzini ushlagancha bir necha daqiqa yotib qoldi.
VAR ushbu vaziyatni qizil kartochka ehtimoli bo‘yicha ko‘rib chiqdi, biroq yakunda bosh hakam Maykl Oliver «Everton» o‘yinchisiga sariq kartochka ko‘rsatish bilan cheklandi.
— Kinning ishlatgan foli (podkati) haqida nima deya olasiz?
— (Bir necha bor yelka qisib) Nima ham derdim? Sariq kartochka. Doku 50 soniyaga safdan chiqdi va qaytishni kutdi.
— Sizningcha, bu vaziyatda qizil kartochka berilishi kerakmidi?
— Bu mening ishim emas, — dedi Gvardiola.













