«Manchester Yunayted» yarim himoyachisi Kazemiro klub bilan xayrlashuvga bag‘ishlangan post qoldirdi.

Yakshanba kuni kunduzi braziliyalik futbolchi «Old Trafford»da «qizil iblislar» safidagi so‘nggi uchrashuvini o‘tkazdi. Bahs maydon egalarining «Nottingem Forest» ustidan qozonilgan 3:2 hisobidagi g‘alabasi bilan yakunlandi.

Yarim himoyachi mahalliy muxlislar bilan xayrlashdi, keyinroq esa ijtimoiy tarmoqlardagi sahifasida maxsus post e’lon qildi.

«Hayotda bizning bir qismimizga aylanib qoladigan joylar bo‘ladi. Manchester doimo mening uyim bo‘lib qoladi. Butun shaharga, klubga va har bir muxlisga chin qalbimdan minnatdorchilik bildiraman. Bu to‘rt yil men va oilam uchun unutilmas bo‘ldi. Biz his qilgan baxt va iliqlikni ta’riflashga so‘z ojiz. Xotiralar va qo‘llab-quvvatlov uchun rahmat. Bundan buyon va abadiy "qizil iblisman"», — deb yozdi 34 yoshli futbolchi.

Kazemiro mavsum yakunida erkin agentga aylanadi.