FIFA prezidenti Janni Infantino Jahon chempionati kubogini Kanada bosh vaziri Mark Karniga topshirdi. Bu haqda TSN telekanali xabar berdi.

Ushbu marosim Ottava shahrida, Jahon chempionati oldidan kubokni namoyish etish doirasida bo‘lib o‘tdi. Mark Karni Kanadada futbol so‘nggi yillarda sezilarli darajada ommalashganini ta’kidladi. Uning aytishicha, bu holat milliy jamoalarning xalqaro maydondagi natijalariga ham ijobiy ta’sir ko‘rsatgan.

Jumladan, Kanada ayollar terma jamoasi 2021 yil Tokio Olimpiadasida oltin medalni qo‘lga kiritgan, erkaklar terma jamoasi esa 1986 yildan beri ilk bor to‘rt yil avval Jahon chempionatiga yo‘l olgan.

2026 yilgi Jahon chempionati 11 iyundan 19 iyulgacha AQSH, Kanada va Meksikada bo‘lib o‘tadi. Kanada terma jamoasi guruh bosqichida Bosniya va Gersegovina, Qatar va Shveysariya bilan bir guruhda o‘ynaydi.