«Galatasaroy» yarim himoyachisi Ilkay Gyundogan «Manchester Siti»ga qaytishi mumkinligi haqidagi mish-mishlarga o‘z munosabatini bildirdi. Kelajakda 35 yoshli futbolchi «shaharliklar»ning murabbiylar shtabidan o‘rin egallashi mumkinligi taxmin qilinmoqda.

«Rafiqam bilan bu haqda hazil tariqasida gaplashib turganmiz, shuningdek, klubdagi insonlar bilan ham bu mavzuda suhbatlar bo‘lgan. Albatta, bunday ehtimol mavjud. Bu qat’iy ravishda mumkin bo‘lgan holat. Men «Manchester Siti»da futbolchi sifatida hamma narsaga erishdim, nega endi o‘zimni u yerda boshqa rolda sinab ko‘rmasligim kerak?» — deya Gyundoganning so‘zlarini keltiradi City Report.

Eslatib o‘tamiz, germaniyalik yarim himoyachi ingliz grandi safida 2016–2023 hamda 2024–2025 yilgi mavsumlarda to‘p surgan. Gyundoganning «Galatasaroy» bilan amaldagi shartnomasi 2027 yilgacha mo‘ljallangan.