«Галатасарой» ярим ҳимоячиси Илкай Гюндоган «Манчестер Сити»га қайтиши мумкинлиги ҳақидаги миш-мишларга ўз муносабатини билдирди. Келажакда 35 ёшли футболчи «шаҳарликлар»нинг мураббийлар штабидан ўрин эгаллаши мумкинлиги тахмин қилинмоқда.
«Рафиқам билан бу ҳақда ҳазил тариқасида гаплашиб турганмиз, шунингдек, клубдаги инсонлар билан ҳам бу мавзуда суҳбатлар бўлган. Албатта, бундай эҳтимол мавжуд. Бу қатъий равишда мумкин бўлган ҳолат. Мен «Манчестер Сити»да футболчи сифатида ҳамма нарсага эришдим, нега энди ўзимни у ерда бошқа ролда синаб кўрмаслигим керак?» — дея Гюндоганнинг сўзларини келтиради City Report.
Эслатиб ўтамиз, германиялик ярим ҳимоячи инглиз гранди сафида 2016–2023 ҳамда 2024–2025 йилги мавсумларда тўп сурган. Гюндоганнинг «Галатасарой» билан амалдаги шартномаси 2027 йилгача мўлжалланган.
