Зинедин Зидан қўл остидаги Франция терма жамоасининг илк уй ўйини тўлиқ стадионда (аншлаг) бўлиб ўтади.
Французлар Миллатлар лигаси доирасида 2 октябрь куни Италияни қабул қилади. RMC Sport хабарига кўра, «Стад де Франс»даги ўйин учун ажратилган барча 80 мингта чипта очиқ сотувга чиқарилганидан сўнг тахминан бир сутка ичида сотиб бўлинган.
Чипталар сотуви 31 июль куни соат 14:00 да бошланган эди. Франциялик ишқибозларнинг Bleus & Fiers ассоциацияси президенти Жан-Батист Монтарньенинг сўзларига кўра, Италияга қарши ўйинга бўлган талаб одатдагидан тахминан уч баравар юқори бўлган.
«Зидан омили яққол сезилиб турибди. Одамлар стадионга келиб, француз футболи афсонаси бўлмиш янги мураббийни кўришни исташмоқда», — деди Монтарнье.
Зидан 28 июль куни Дидье Дешам ўрнини эгаллаб, Франция терма жамоасини бошқаришга киришди. Унинг қўл остидаги илк ўйин 25 сентябрь куни меҳмонда Туркияга қарши бўлиб ўтади. Шундан сўнг французлар Бельгия меҳмони бўлишади, сўнгра «Стад де Франс»да Италия ва Бельгияни қабул қилишади.
