Zinedin Zidan qo‘l ostidagi Fransiya terma jamoasining ilk uy o‘yini to‘liq stadionda (anshlag) bo‘lib o‘tadi.

Fransuzlar Millatlar ligasi doirasida 2 oktyabr kuni Italiyani qabul qiladi. RMC Sport xabariga ko‘ra, «Stad de Frans»dagi o‘yin uchun ajratilgan barcha 80 mingta chipta ochiq sotuvga chiqarilganidan so‘ng taxminan bir sutka ichida sotib bo‘lingan.

Chiptalar sotuvi 31 iyul kuni soat 14:00 da boshlangan edi. Fransiyalik ishqibozlarning Bleus & Fiers assosiasiyasi prezidenti Jan-Batist Montarnyening so‘zlariga ko‘ra, Italiyaga qarshi o‘yinga bo‘lgan talab odatdagidan taxminan uch baravar yuqori bo‘lgan.

«Zidan omili yaqqol sezilib turibdi. Odamlar stadionga kelib, fransuz futboli afsonasi bo‘lmish yangi murabbiyni ko‘rishni istashmoqda», — dedi MontarnYE.

Zidan 28 iyul kuni Didye Desham o‘rnini egallab, Fransiya terma jamoasini boshqarishga kirishdi. Uning qo‘l ostidagi ilk o‘yin 25 sentyabr kuni mehmonda Turkiyaga qarshi bo‘lib o‘tadi. Shundan so‘ng fransuzlar Belgiya mehmoni bo‘lishadi, so‘ngra «Stad de Frans»da Italiya va Belgiyani qabul qilishadi.