Italiya chempioni — «Inter» yozgi transfer oynasida «Atalanta»ning 21 yoshli iqtidorli qanot himoyachisi Marko Palestrani tarkibga qo‘shib olishni maqsad qilgan.

Jurnalist Simone Tonyaning xabar berishicha, «neradzurrilar» rahbariyati Denzel Dyumfrisning kelajagidan qat’i nazar, ushbu transferni amalga oshirishni rejalashtirmoqda. Jamoa bosh murabbiyi Kristian Kivu iqtidorli futbolchini har ikki qanotda ham samarali foydalanishni ko‘zlamoqda. «Inter» boshqa top-klublarning jiddiy raqobatiga qaramay, yosh himoyachi uchun kurashda davom etishga tayyor.

Ma’lumot uchun, o‘tgan mavsumni «Kalyari» safida ijara asosida o‘tkazgan Marko Palestra A Seriyada 37 ta o‘yinda maydonga tushib, 1 ta gol va 4 ta golli uzatmaga mualliflik qildi. Transfermarkt portali futbolchini 30 million yevroga baholamoqda.