Vinger Jedon Sancho ijara muddati tugaganidan keyin ham «Aston Villa»da qolishi mumkin. Bu haqda Football Insider nashri xabar bermoqda.

Jamoa bosh murabbiyi Unai Emeri futbolchi bilan hamkorlikni davom ettirishdan manfaatdor va uni erkin agent sifatida tarkibga qo‘shib olish imkoniyatini ko‘rib chiqmoqda. 26 yoshli ingliz futbolchisining «Manchester Yunayted» bilan shartnomasi shu yilning iyun oyi oxirida yakuniga yetadi.

Sancho Birmingem klubi tarkibida muvaffaqiyatli mavsumni o‘tkazdi va jamoaning rotasiyasida muhim rol o‘ynab, «Aston Villa»ning Yevropa Ligasi kubogini qo‘lga kiritishiga yordam berdi. Birmingemliklarning sobiq skauti Mik Braunning fikricha, to‘laqonli transfer amalga oshishi ehtimoli bor, biroq ko‘p narsa moliyaviy shartlarga bog‘liq bo‘ladi.

«Villa» unga «Manchester Yunayted»da olgan maoshiga yaqin bo‘lgan mablag‘ni ham to‘lamaydi. Aynan shu sabab tufayli u o‘z vaqtida «Chelsi» bilan kelisha olmagan edi», — deya ta’kidladi Braun.

Avvalroq Dortmundning «Borussiya» klubi rahbariyati ham Sanchoni taklif qilishdan manfaatdor ekani va uning klubga uchinchi bor qaytishi imkoniyatini ko‘rib chiqishga tayyorligi haqida xabar berilgan edi.