«RB Leypsig» klubi vingeri Yan Diomande «Liverpul»ning asosiy transfer maqsadlari qatoridan joy olishda davom etmoqda.

Angliya grandi 19 yoshli futbolchi uchun taxminan 100 million yevro taklif qilgan edi, biroq «qizil buqalar»ni bunday shartlar qoniqtirmadi. Taniqli jurnalist Pol Joysning bergan ma’lumotlariga ko‘ra, yaqin kunlarda «Liverpul» ushbu istiqbolli ivuarlik futbolchi uchun yangilangan rasmiy taklif bilan chiqish niyatida.

Aslida «RB Leypsig» Yan Diomandeni sotishni istamayapti, shu sababli ular faqatgina o‘zlari uchun «o‘ta foydali» bo‘ladigan kosmik takliflarnigina ko‘rib chiqishlari mumkin. Yakunlangan mavsumda yosh iqtidor egasi nemis jamoasi safida barcha turnirlarda jami 36 ta o‘yinda maydonga tushib, 13 ta gol urdi va 10 ta golli uzatmani o‘z hisobiga yozdirib qo‘ydi.