Madridning «Atletiko» klubi sobiq himoyachisi Diyego Godin hujumchi Xulian Alvaresning jamoadagi kelajagi borasida o‘z fikrini bildirdi. Mish-mishlarga ko‘ra, argentinalik forvard anchadan beri uni o‘z safiga qo‘shib olishni orzu qilayotgan «Barselona»ga o‘tishni xohlamoqda. «Matraschilar» esa o‘z yulduzini qo‘yib yuborishni istamayapti.

«Yaqinda Fernando Torres aytganidek, «Atletiko»da shunchaki to‘p surishning o‘zi kifoya qilmaydi — bu yerda o‘ynashni chin dildan xohlash kerak. Xulian qoladi deb umid qilaman. Nima sodir bo‘lishini bilmayman, lekin uning chindan ham shu yerda qolishni istashidan umidvorman. Alvares — ajoyib futbolchi, hozirgi vaqtda bunaqasini topish qiyin. Aqlga sig‘adigan mablag‘ evaziga unga munosib o‘rinbosar topishning umuman iloji yo‘q», — deya Godinning so‘zlarini keltiradi Mundo Deportivo nashri.

Xulian Alvaresga «Barselona»dan tashqari Madridning «Real», shuningdek, «PSJ» va «Arsenal» klublari ham qiziqish bildirishgan.