Мадриднинг «Атлетико» клуби собиқ ҳимоячиси Диего Годин ҳужумчи Хулиан Альвареснинг жамоадаги келажаги борасида ўз фикрини билдирди. Миш-мишларга кўра, аргентиналик форвард анчадан бери уни ўз сафига қўшиб олишни орзу қилаётган «Барселона»га ўтишни хоҳламоқда. «Матрасчилар» эса ўз юлдузини қўйиб юборишни истамаяпти.

«Яқинда Фернандо Торрес айтганидек, «Атлетико»да шунчаки тўп суришнинг ўзи кифоя қилмайди — бу ерда ўйнашни чин дилдан хоҳлаш керак. Хулиан қолади деб умид қиламан. Нима содир бўлишини билмайман, лекин унинг чиндан ҳам шу ерда қолишни исташидан умидворман. Альварес — ажойиб футболчи, ҳозирги вақтда бунақасини топиш қийин. Ақлга сиғадиган маблағ эвазига унга муносиб ўринбосар топишнинг умуман иложи йўқ», — дея Годиннинг сўзларини келтиради Mundo Deportivo нашри.

Хулиан Альваресга «Барселона»дан ташқари Мадриднинг «Реал», шунингдек, «ПСЖ» ва «Арсенал» клублари ҳам қизиқиш билдиришган.