Madridning «Real» klubi «Chelsi» yarim himoyachisi Enso Fernandesning transferi bo‘yicha muzokaralar olib bormayapti. Bu haqda nufuzli insayder Fabrisio Romano ma’lum qildi.

Manbaning xabariga ko‘ra, tarqalgan turli mish-mishlarga qaramay, «Real» va «Chelsi» o‘rtasida hozircha hech qanday muzokaralar yo‘q. «Qaymoqranglilar» lagerida argentinalik futbolchining darajasini haqiqatan ham yuqori baholashadi, biroq u klubning tarkibni kuchaytirish ro‘yxatidagi beshta nomzoddan biri xolos.

Yakunlangan klub mavsumida 25 yoshli Fernandes barcha musobaqalarda 54 ta o‘yinda ishtirok etdi. Ushbu bahslarda yarim himoyachi 15 ta gol urdi va 7 ta golli uzatmani o‘z hisobiga yozdirib qo‘ydi.

Futbolchining «Chelsi» bilan amaldagi mehnat shartnomasi 2032 yilning iyun oyiga qadar mo‘ljallangan.