Мадриднинг «Реал» клуби «Челси» ярим ҳимоячиси Энцо Фернандеснинг трансфери бўйича музокаралар олиб бормаяпти. Бу ҳақда нуфузли инсайдер Фабрицио Романо маълум қилди.

Манбанинг хабарига кўра, тарқалган турли миш-мишларга қарамай, «Реал» ва «Челси» ўртасида ҳозирча ҳеч қандай музокаралар йўқ. «Қаймоқранглилар» лагерида аргентиналик футболчининг даражасини ҳақиқатан ҳам юқори баҳолашади, бироқ у клубнинг таркибни кучайтириш рўйхатидаги бешта номзоддан бири холос.

Якунланган клуб мавсумида 25 ёшли Фернандес барча мусобақаларда 54 та ўйинда иштирок этди. Ушбу баҳсларда ярим ҳимоячи 15 та гол урди ва 7 та голли узатмани ўз ҳисобига ёздириб қўйди.

Футболчининг «Челси» билан амалдаги меҳнат шартномаси 2032 йилнинг июнь ойига қадар мўлжалланган.