Milanning «Inter» klubi vinger Mussa Diabi transferi bo‘yicha ishlarni davom ettirmoqda. Klub Saudiya Arabistonining «Al-Ittihod» jamoasi uchun yangi taklif tayyorladi.

Saudiyalik jurnalist Muhammad al-Bukairiyga tayangan holda Goal portali xabar berishicha, Italiya klubi futbolchini to‘liq sotib olish bo‘yicha dastlabki rejasidan voz kechgan va endi 27 yoshli fransuz uchun bir mavsumga 28 million yevrolik ijara taklif qilmoqda.

Avvalroq «Inter» futbolchining to‘liq transferi uchun taxminan 40 million yevro to‘lashga tayyor edi, ammo «Al-Ittihod» rahbariyati uni sotish borasida uzil-kesil qarorga kelmagan edi.

Milan klubi ijara varianti Saudiya tomoni uchun jozibadorroq bo‘lishiga umid qilmoqda. Ta’kidlanishicha, futbolchining o‘zi esa to‘liq transferni ma’qul ko‘rmoqda.

O‘tgan mavsumda Diabi 43 ta o‘yinda maydonga tushib, 6 ta gol urdi va 15 ta golli uzatmaga mualliflik qildi.