Madridning «Real» klubi uy arenasi hisoblangan «Santyago Bernabeu» JCH-2030 final o‘yinini o‘tkazish uchun asosiy nomzod bo‘lib turibdi, deb xabar beradi Radio Nacional de España (RNE).

Eslatib o‘tamiz, 2030 yilgi Jahon chempionatiga uchta mamlakat — Ispaniya, Portugaliya va Marokash mezbonlik qiladi. Shuningdek, turnirning dastlabki o‘yinlari Urugvay, Argentina va Paragvayda ham o‘tkaziladi.

Avvalroq, hal qiluvchi bahsni o‘tkazish huquqi Marokashga berilishi mumkinligi haqida xabarlar tarqalgan edi. Ta’kidlanishicha, FIFA prezidenti Janni Infantino shu yo‘l bilan bo‘lajak FIFA prezidentligi saylovlarida Marokash futbol federasiyasining qo‘llab-quvvatloviga erishmoqchi bo‘lgan. Biroq ko‘p o‘tmay FIFA bu ma’lumotni rad etdi.

Marokash tomonining noroziligini oldini olish va murosaga kelish maqsadida, ushbu Afrika mamlakatiga 2029 yilgi Klublar o‘rtasidagi Jahon chempionatini o‘tkazish huquqi berilishi mumkinligi aytilmoqda.

Mart oyida FIFAning yangi rahbariyatini saylash jarayoni bo‘lib o‘tadi va Infantino yana bir muddatga qayta saylanishni niyat qilgan.

RNE ma’lumotlariga ko‘ra, hozirda amaldagi prezidentni Afrika (54) va Osiyo (47) federasiyalari — jami 101 ta ovoz bilan qo‘llab-quvvatlamoqda. Qayta saylanish uchun unga 106 ta ovoz kerak bo‘ladi. Unga qarshi esa birgalikda 96 ta ovozga ega bo‘lgan UEFA va KONKAKAF chiqmoqda.