Мадриднинг «Реал» клуби уй аренаси ҳисобланган «Сантьяго Бернабеу» ЖЧ-2030 финал ўйинини ўтказиш учун асосий номзод бўлиб турибди, деб хабар беради Radio Nacional de España (RNE).
Эслатиб ўтамиз, 2030 йилги Жаҳон чемпионатига учта мамлакат — Испания, Португалия ва Марокаш мезбонлик қилади. Шунингдек, турнирнинг дастлабки ўйинлари Уругвай, Аргентина ва Парагвайда ҳам ўтказилади.
Аввалроқ, ҳал қилувчи баҳсни ўтказиш ҳуқуқи Марокашга берилиши мумкинлиги ҳақида хабарлар тарқалган эди. Таъкидланишича, ФИФА президенти Жанни Инфантино шу йўл билан бўлажак ФИФА президентлиги сайловларида Марокаш футбол федерациясининг қўллаб-қувватловига эришмоқчи бўлган. Бироқ кўп ўтмай ФИФА бу маълумотни рад этди.
Марокаш томонининг норозилигини олдини олиш ва муросага келиш мақсадида, ушбу Африка мамлакатига 2029 йилги Клублар ўртасидаги Жаҳон чемпионатини ўтказиш ҳуқуқи берилиши мумкинлиги айтилмоқда.
Март ойида ФИФАнинг янги раҳбариятини сайлаш жараёни бўлиб ўтади ва Инфантино яна бир муддатга қайта сайланишни ният қилган.
RNE маълумотларига кўра, ҳозирда амалдаги президентни Африка (54) ва Осиё (47) федерациялари — жами 101 та овоз билан қўллаб-қувватламоқда. Қайта сайланиш учун унга 106 та овоз керак бўлади. Унга қарши эса биргаликда 96 та овозга эга бўлган УEФА ва КОНКАКАФ чиқмоқда.
