«Milan» darvozaboni va sardori Mayk Menyanning kelajagi so‘roq ostida qoldi. La Gazzetta dello Sport ma’lumotlariga ko‘ra, Bento ketganidan keyin yangi asosiy darvozabon qidirayotgan Saudiya Arabistonining «An-Nasr» klubi fransiyalik futbolchiga qiziqmoqda.
Menyan yanvar oyi oxirida «Milan» bilan shartnomani uzaytirgan edi. Kelishuv 2031 yilgacha mo‘ljallangan bo‘lib, 31 yoshli darvozabonning maoshi oson erishiladigan bonuslar bilan birga taxminan 7 million yevroni tashkil qiladi.
Shu bilan birga, Menyanning klub bilan munosabatlari so‘nggi paytlarda murakkablashdi. Manbaning xabar berishicha, fransiyalik futbolchi rahbariyatning bosh murabbiy Massimiliano Allegri, sport direktori Igli Tare va o‘zi bilan yaxshi munosabatda bo‘lgan darvozabonlar murabbiyi Klaudio Filippi bilan xayrlashish haqidagi qaroridan norozi bo‘lgan.
«Milan» rahbariyati Menyan bilan vaziyatga munosabati va kelajakdagi rejalarini muhokama qilish uchun shaxsiy uchrashuv o‘tkazishga qaror qilgan. Klub fransiyalik o‘yinchini olib qolishga tayyor, ammo hamkorlikni davom ettirishda o‘zaro xohish bo‘lishiga umid qilmoqda. Agar Menyan ketishni istasa, «Milan» mos taklif tushgan taqdirda ushbu imkoniyatni ko‘rib chiqadi.
