"Manchester Siti" "Palmeyras"ning 22 yoshli futbolchisi Allan Elias transferi bo‘yicha Braziliya klubi bilan aloqaga chiqdi.

Insayder Fabrisio Romano ma’lumotiga ko‘ra, Allan "Tottenxem"ga o‘tishga yaqin turgan Savinyoning o‘rnini egallash uchun "shaharliklar"ning asosiy nomzodlaridan biri hisoblanmoqda. Savinyoning transferi bo‘yicha "Tottenxem" va "Manchester Siti" o‘rtasida kelishuvga erishilgani haqida ham xabarlar bor.

Tomonlar ehtimoliy transfer narxi yuzasidan dastlabki muzokaralarni boshlagan. "Manchester Siti" Allanning Angliya klubiga o‘tish istagi muzokaralarning ijobiy yakunlanishiga yordam berishiga umid qilmoqda. Ayni paytda "Palmeyras" futbolchini osonlikcha qo‘yib yubormoqchi emas va hozircha rasmiy taklif kelib tushmagani aytilmoqda.

"Palmeyras" tarbiyalanuvchisi joriy mavsumda 41 ta uchrashuvda maydonga tushib, 6 ta gol urdi va 5 ta golli uzatmani amalga oshirdi.